జనం న్యూస్, ఆగస్టు 17, జగిత్యాల జిల్లా : మెట్‌పల్లి బీడీ కార్మిక మహిళలకు బీడీ పెన్షన్లు, అర్హులైన వృద్ధులకు వృద్ధాప్య పెన్షన్లు వెంటనే మంజూరు చేయాలని డిమాండ్ చేస్తూ కోరుట్ల ఎమ్మెల్యే డాక్టర్ కల్వకుంట్ల సంజయ్ ఆధ్వర్యంలో మెట్‌పల్లి పాత బస్‌స్టాండ్ ప్రాంగణంలో ధర్నా కార్యక్రమం నిర్వహించారు. ఈ కార్యక్రమంలో బీడీ కార్మిక మహిళలు, వృద్ధులు, పార్టీ నాయకులు, కార్యకర్తలు పెద్ద సంఖ్యలో పాల్గొని ప్రభుత్వానికి తమ డిమాండ్లను తెలియజేశారు.ఈ సందర్భంగా ఎమ్మెల్యే సంజయ్ మాట్లాడుతూ.. బీడీ కార్మిక మహిళలు ఎన్నో సంవత్సరాలుగా బీడీలు తయారు చేస్తూ తమ కుటుంబాలను పోషిస్తున్నారని తెలిపారు. బీడీ తయారీపై ఆధారపడిన మహిళలకు పెన్షన్ అనేది కేవలం ఆర్థిక సహాయం మాత్రమే కాదని, వారి కుటుంబాలకు ఒక భరోసా అని అన్నారు. వయసు మీదపడిన తర్వాత కూడా పెన్షన్ కోసం ఎదురుచూడాల్సిన పరిస్థితి రావడం బాధాకరమన్నారు.2014లో అప్పటి ముఖ్యమంత్రి కేసీఆర్ బీడీ కార్మికుల కోసం ప్రత్యేకంగా బీడీ పెన్షన్‌ను ప్రారంభించారని ఎమ్మెల్యే గుర్తు చేశారు. దేశంలోనే బీడీ కార్మికులకు ప్రత్యేక పెన్షన్ అందించిన ఏకైక రాష్ట్రం తెలంగాణ అని తెలిపారు. తొలుత నెలకు రూ.1,000 చొప్పున పెన్షన్ అందించగా, అనంతరం దానిని రూ.2,000కు పెంచినట్లు పేర్కొన్నారు. ఈ పెన్షన్ ద్వారా బీడీ కార్మిక మహిళలు తమ చిన్నచిన్న అవసరాలను తీర్చుకోవడంతో పాటు కుటుంబంపై పూర్తిగా ఆధారపడకుండా ఆత్మగౌరవంతో జీవించగలిగారని అన్నారు.కేసీఆర్ ప్రభుత్వ హయాంలో ఆసరా పథకం ద్వారా లక్షలాది మంది వృద్ధులు, వితంతువులు, దివ్యాంగులు, ఇతర అర్హులకు పెన్షన్లు అందించామని సంజయ్ తెలిపారు. ఆర్థికంగా ఇబ్బందులు ఉన్నప్పటికీ సామాజిక భద్రతకు ప్రాధాన్యత ఇచ్చామని అన్నారు. కరోనా మహమ్మారి సమయంలో ప్రజలు తీవ్ర ఇబ్బందులు ఎదుర్కొన్నప్పటికీ పెన్షన్లను కొనసాగించామని పేర్కొన్నారు.ప్రస్తుతం కాంగ్రెస్ ప్రభుత్వం అధికారంలోకి వచ్చి మూడేళ్లు కావస్తున్నా అనేక మంది అర్హులకు పెన్షన్లు అందకపోవడం ఆందోళన కలిగిస్తోందని ఎమ్మెల్యే అన్నారు. ముఖ్యంగా బీడీ కార్మిక మహిళలు, వృద్ధులు, వితంతువులు పెన్షన్ల కోసం ఎదురుచూస్తున్నారని తెలిపారు. ఎన్నికల సమయంలో నెలకు రూ.4,000 పెన్షన్ ఇస్తామని కాంగ్రెస్ హామీ ఇచ్చిందని, ఆ హామీని అమలు చేయడం మాట అటుంచి గతంలో అందుతున్న పెన్షన్లను కూడా సక్రమంగా అందించకపోవడం సరైంది కాదన్నారు.ప్రభుత్వం వెంటనే స్పందించి కనీసం గతంలో అందించిన రూ.2,000 పెన్షన్‌ను అయినా అర్హులైన బీడీ కార్మిక మహిళలు, వృద్ధులు, వితంతువులకు మంజూరు చేయాలని డిమాండ్ చేశారు. పెన్షన్ కోసం దరఖాస్తు చేసుకున్న అర్హులైన ప్రతి ఒక్కరినీ గుర్తించి ఎలాంటి జాప్యం లేకుండా పెన్షన్ మంజూరు చేయాలని కోరారు.పెన్షన్ అనేది వృద్ధులు, వితంతువులు, బీడీ కార్మిక మహిళలకు నెలవారీ జీవనాధారంగా ఉంటుందని ఎమ్మెల్యే అన్నారు. మందులు, నిత్యావసర సరుకులు, కుటుంబ అవసరాల కోసం ఈ మొత్తంపై ఆధారపడే అనేక కుటుంబాలు ఉన్నాయని తెలిపారు. ప్రభుత్వం పెన్షన్లు నిలిపివేయడం లేదా మంజూరులో జాప్యం చేయడం వల్ల ఆయా కుటుంబాలు ఆర్థిక ఇబ్బందులు ఎదుర్కొంటున్నాయని పేర్కొన్నారు.అదేవిధంగా రాష్ట్ర ప్రభుత్వం కల్యాణ లక్ష్మీ, షాదీ ముబారక్ పథకాలను కొనసాగించాలని సంజయ్ డిమాండ్ చేశారు. పేద కుటుంబాలకు ఆర్థికంగా అండగా నిలిచిన ఈ పథకాలను మరింత సమర్థవంతంగా అమలు చేయాలని కోరారు. తల్లులు, శిశువుల ఆరోగ్యానికి ఉపయోగపడే కేసీఆర్ కిట్ పథకాన్ని కూడా తిరిగి ప్రారంభించాలని ప్రభుత్వాన్ని డిమాండ్ చేశారు.బీడీ కార్మికులు, వృద్ధులు, వితంతువుల సమస్యలను ప్రభుత్వం రాజకీయ కోణంలో కాకుండా మానవతా దృక్పథంతో చూడాలని సంజయ్ కోరారు. అర్హత ఉన్న ప్రతి ఒక్కరికీ సంక్షేమ పథకాలు అందేలా అధికారులు చర్యలు తీసుకోవాలని అన్నారు.

ధర్నా అనంతరం ఎమ్మెల్యే సంజయ్ ఆధ్వర్యంలో బీడీ కార్మిక మహిళలు, పార్టీ నాయకులు, కార్యకర్తలు కలిసి మెట్‌పల్లి ఆర్డీఓకు వినతిపత్రం సమర్పించారు. బీడీ కార్మిక మహిళలకు బీడీ పెన్షన్లు, అర్హులైన వృద్ధులు, వితంతువులకు పెన్షన్లు వెంటనే మంజూరు చేయడంతో పాటు వారి కుటుంబాలకు ఆర్థిక భరోసా కల్పించేలా ప్రభుత్వం తక్షణ చర్యలు చేపట్టాలని వినతిపత్రం ద్వారా కోరారు.