జనం న్యూస్ జూన్ 21 తెలంగాణ స్టేట్ ఇంచార్జ్ శ్రీనివాస్ రెడ్డి కూకట్‌పల్లిలోని రామ్‌దేవ్‌రావు హాస్పిటల్ మరోసారి తన సేవా ప్రమాణాలను చాటుకుంటూ ప్రతిష్ఠాత్మకమైన "ఉత్తమ కాలుష్య నియంత్రణ అవార్డు"ను అందుకొని గర్వకారణంగా నిలిచింది. హైటెక్ సిటీలోని యశోద హాస్పిటల్స్‌లో నిర్వహించిన హెల్త్‌కేర్ లీడర్‌షిప్ కాన్ఫరెన్స్ సందర్భంగా ఈ పురస్కారం ఆసుపత్రికి లభించింది.ఆసుపత్రి తరఫున సీఈఓ డా. ఎన్. యోబు ఈ అవార్డును స్వీకరించారు. పర్యావరణ పరిరక్షణ, కాలుష్య నియంత్రణ, బయోమెడికల్ వ్యర్థాల సమర్థ నిర్వహణతో పాటు హరిత ఆరోగ్య సంరక్షణ కార్యక్రమాలను సమర్థవంతంగా అమలు చేయడంలో రామ్‌దేవ్‌రావు హాస్పిటల్ చేసిన విశిష్ట సేవలకు గుర్తింపుగా ఈ ప్రతిష్ఠాత్మక పురస్కారం వరించింది.ఈ సదస్సుకు తెలంగాణ గవర్నర్ శివ్ ప్రతాప్ శుక్లా ముఖ్య అతిథిగా హాజరై కార్యక్రమానికి ప్రత్యేక ఆకర్షణగా నిలిచారు. దేశంలోని ప్రముఖ వైద్య నిపుణులు, ఆరోగ్య రంగ నాయకులు, విధాన నిర్ణేతలు, ఆసుపత్రి నిర్వాహకులు, నాణ్యత ప్రమాణాల నిపుణులు పాల్గొని ఆరోగ్య రంగంలో నాయకత్వం, సాంకేతిక ఆవిష్కరణలు, స్థిరమైన అభివృద్ధి, నాణ్యమైన సేవల విస్తరణ వంటి అంశాలపై విస్తృతంగా చర్చించారు. రామ్‌దేవ్‌రావు హాస్పిటల్‌కు లభించిన ఈ అవార్డు యాజమాన్యం, వైద్యులు, నర్సింగ్ సిబ్బంది, సహాయక సిబ్బంది సమిష్టి కృషికి నిదర్శనంగా నిలిచింది. నాణ్యమైన వైద్య సేవలను అందించడంతో పాటు పర్యావరణ పరిరక్షణకు అత్యంత ప్రాధాన్యత ఇస్తూ ఆరోగ్య రంగంలో ఆదర్శంగా నిలవాలనే ఆసుపత్రి సంకల్పానికి ఈ గుర్తింపు మరింత బలాన్ని చేకూర్చిందని నిర్వాహకులు పేర్కొన్నారు.ఈ సందర్భంగా ఆసుపత్రి యాజమాన్యం మాట్లాడుతూ, ఈ విజయానికి సహకరించిన ప్రతి ఉద్యోగికి, వైద్య సిబ్బందికి, శ్రేయోభిలాషులకు కృతజ్ఞతలు తెలిపారు. ఈ పురస్కారం భవిష్యత్తులో మరింత ఉన్నత ప్రమాణాలతో సేవలు అందించేందుకు ప్రేరణగా నిలుస్తుందని పేర్కొన్నారు. రామ్‌దేవ్‌రావు హాస్పిటల్ సాధించిన ఈ విశిష్ట విజయంపై పలువురు వైద్య రంగ ప్రముఖులు, శ్రేయోభిలాషులు అభినందనలు తెలియజేశారు. పర్యావరణ పరిరక్షణకు ప్రాధాన్యత ఇస్తూ నాణ్యమైన వైద్య సేవలను అందిస్తున్న ఆసుపత్రికి ఈ అవార్డు దక్కడం అభినందనీయమని వారు పేర్కొన్నారు.