సోమవారం నుంచి ఇంద్రేశం–సికింద్రాబాద్ నేరుగా రవాణా

జనం న్యూస్ డిసెంబర్ 23 సంగారెడ్డి జిల్లా:

ప్రజా రవాణా సేవలను మరింత విస్తరించి, కొత్త కాలనీల ప్రజలకు మెరుగైన సౌకర్యాలు కల్పించడంతో పాటు కొత్త ప్రయాణికులను ఆకర్షించాలనే లక్ష్యంతో రాణిగంజ్ డిపో పరిధిలో సోమవారం నుంచి కొత్త బస్సు సేవలను ప్రారంభిస్తున్నట్లు డిపో నిర్వాహకుడు ఏ. శ్రీధర్ తెలిపారు.ఈ సందర్భంగా ఆయన మాట్లాడుతూ, సికింద్రాబాద్ నుంచి ఇంద్రేశం వరకు నేరుగా బస్సు సౌకర్యం కల్పిస్తున్నట్లు పేర్కొన్నారు. ఈ కొత్త బస్సు మార్గం సికింద్రాబాద్ ప్యాట్నీ, సీటీఓ, తాడ్‌బాన్, బోయిన్పల్లి, బాల్‌నగర్, ప్రశాంత్‌నగర్, కూకట్‌పల్లి, కేపీహెచ్‌బీ, హైదర్‌నగర్, మదీనాగూడ, లింగంపల్లి, అశోక్‌నగర్, ఆర్‌సీపురం, ఇక్రిశాట్, పటాన్‌చెరు, ధ్రువ ఆసుపత్రి, ఇంద్రేశం క్రాస్ రోడ్ మీదుగా ఇంద్రేశం ప్రాంతానికి చేరుకుంటుందని తెలిపారు.ఈ మార్గంలో నాలుగు షెడ్యూళ్లతో ఎనిమిది బస్సు సేవలు, మొత్తం ముప్పై రెండు ప్రయాణాలు నిర్వహించనున్నట్లు వెల్లడించారు. ప్రతి ఇరవై ఐదు నిమిషాలకు ఒక బస్సు అందుబాటులో ఉండేలా ఏర్పాట్లు చేసినట్లు చెప్పారు. అలాగే ఇంద్రేశం, పటాన్‌చెరు నుంచి సికింద్రాబాద్ వరకు నేరుగా బస్సు సేవలు అందుబాటులోకి తీసుకొస్తున్నట్లు తెలిపారు.ఈ కొత్త బస్సు మార్గాల ద్వారా ఆయా కాలనీల ప్రజలకు సౌకర్యవంతమైన, సురక్షితమైన, సమయపాలనతో కూడిన రవాణా సదుపాయం అందుబాటులోకి వస్తుందని డిపో నిర్వాహకుడు తెలిపారు. ప్రజలు ఈ అవకాశాన్ని సద్వినియోగం చేసుకొని రాణిగంజ్ డిపో అందిస్తున్న బస్సు సేవలను విస్తృతంగా వినియోగించుకోవాలని కోరారు.ఈ సందర్భంగా డిపో నిర్వాహకుడు ఏ. శ్రీధర్ స్వయంగా బస్సులో ఇంద్రేశం వరకు ప్రయాణించి ప్రయాణికుల సమస్యలను తెలుసుకున్నారు. ఈ కార్యక్రమంలో సహాయ నిర్వాహకుడు మహమ్మద్ అలీ, సీఆర్సీ ధర్మేందర్, కాళేశ్వర్, వాహనాల పర్యవేక్షకుడు ప్రసాద్, నిర్వహణ విభాగానికి చెందిన వాసుదేవ్, అప్రమత్తత విభాగానికి చెందిన హెడ్ కానిస్టేబుల్ తదితరులు పాల్గొన్నారు.