జనం న్యూస్‌ 29 డిసెంబర్, విజయనగరం టౌన్‌ రిపోర్టర్‌ గోపికృష్ణ పట్నాయక్‌

సమాచార హక్కు చట్టం -2005ను ప్రభుత్వ పరిపాలనలో పారదర్శకత బాధ్యత పెంపొందించేందుకు అమలు చేశారు. ప్రజలకు ప్రభుత్వ సమాచారం అందుబాటులో ఉంచడం ద్వారా అవినీతిని అడ్డుకోవడమే ఈ చట్ట ప్రధాన లక్ష్యం. అయితే ఇటీవల కాలంలో ఈ చట్ట ఉల్లంఘనలు పెరిగిపోతూ దాని అసలు ఉద్దేశ్యమే నీరుగారిపోతున్న పరిస్థితి కనిపిస్తోంది. చట్టం ప్రకారం దరఖాస్తు చేసిన తేదీ నుంచి 30 రోజుల్లోపు సమాచారాన్ని అందజేయాలి. అయినప్పటికీ అనేక ప్రభుత్వ కార్యాలయాల్లో ప్రజా సమాచార అధికారులు ఈ నిబంధనను పూర్తిగా విస్మరిస్తున్నారు. కొన్ని సందర్భాల్లో అసందర్భ సమాచారం ఇవ్వడం మరికొన్ని సందర్భాల్లో తప్పుదారి పట్టించే సమాధానాలు పంపించడం ద్వారా చట్టాన్ని స్పష్టంగా ఉల్లంఘిస్తున్నారు.ఇది కేవలం పరిపాలనా నిర్లక్ష్యం మాత్రమే కాదు ప్రజల మౌలిక హక్కుల ఉల్లంఘన కూడా. సమాచారాన్ని దాచడం లేదా ఆలస్యం చేయడం ప్రజాస్వామ్య వ్యవస్థకు తీవ్రమైన ముప్పుగా మారుతుంది. సమాచార హక్కు చట్టం ప్రకారం ప్రతి ప్రభుత్వ కార్యాలయంలో ప్రజా సమాచార అధికారి, సహాయక ప్రజా సమాచార అధికారి, ప్రథమ అప్పీళ్ల అధికారి వివరాలను స్పష్టంగా ప్రదర్శించడం తప్పనిసరి. కానీ వాస్తవ పరిస్థితి ఇందుకు భిన్నంగా ఉంది. చాలా కార్యాలయాల్లో ఈ వివరాలు కనిపించకపోవడం వల్ల సాధారణ పౌరులు తమ చట్టబద్ధమైన హక్కులను వినియోగించుకోవడంలో ఇబ్బందులు ఎదుర్కొంటున్నారు.ప్రభుత్వ అధికారులు ఒక విషయం స్పష్టంగా గుర్తుంచుకోవాలి: సమాచారం ప్రజల సొత్తు. సమాచారం ఇవ్వడం ఏ విధమైన దయ కాదు, అది ప్రజాస్వామ్యంలో అధికారులపై ఉన్న చట్టబద్ధమైన బాధ్యత. సమాచార హక్కు చట్ట ఉల్లంఘనలపై ప్రజలు స్వచ్ఛంద సంస్థలు పౌర సంఘాలు మీడియా కలిసి ప్రశ్నించాల్సిన అవసరం ఉంది. అప్పుడే ప్రభుత్వ యంత్రాంగంలో జవాబుదారీతనం పెరుగుతుంది. అప్పుడే ప్రజాస్వామ్యం నిజమైన అర్థంలో పనిచేస్తుంది. పారదర్శకత ప్రజాస్వామ్యాన్ని బలపరుస్తుంది, రహస్యత్వం దాన్ని నాశనం చేస్తుంది.