జనం న్యూస్‌ 16 జనవరి, విజయనగరం టౌన్‌ రిపోర్టర్‌ గోపికృష్ణ పట్నాయక్‌

ఆధునిక పోకడల్లో పడి అందరూ మన మూలాలను మర్చిపోతున్న తరుణంలో, ఒక వ్యక్తి తన వృత్తిని నిర్వహిస్తూనే మన ప్రాచీన కళను కాపాడుతూ అందరికీ స్ఫూర్తిగా నిలుస్తున్నారు. ఆయనే విజయనగరం జిల్లా కలెక్టర్ కార్యాలయ క్యాంటీన్ నడుపుతున్న రమణ. అధికారులు, సామాన్య ప్రజలతో నిత్యం రద్దీగా ఉండే కలెక్టరేట్ ప్రాంగణంలో అందరికీ సుపరిచితుడైన రమణ, పండుగ వేళలో తనలోని మరో కోణాన్ని ఆవిష్కరించాడు. గంగిరెద్దుల వేషధారణలో, డోలు దరువుతో మన తెలుగు వారి అచ్చమైన సంప్రదాయానికి ప్రతిరూపంగా నిలిచారు.క్యాంటీన్ బాధ్యతల్లో ఉంటూనే.. కళపై మక్కువ క్యాంటీన్ బాధ్యతలు చూసుకుంటూ ఎంతో బిజీగా గడిపే రమణ, పండుగ రాగానే మన సంస్కృతిని భుజాన వేసుకుంటాడు. డోలును భుజానికి తగిలించుకుని ఆయన ఇచ్చే దరువు, ఆ సన్నాయి రాగాల సందడి పల్లెటూరి వాతావరణాన్ని తలపిస్తుంది. హోదా కంటే మన వారసత్వమే గొప్పదని రమణ నిరూపిస్తున్నారు.అందరికీ ఒక స్ఫూర్తి నేటి తరం యువత తమ సంస్కృతిని, కళలను మర్చిపోతున్న తరుణంలో, జిల్లా కలెక్టర్ కార్యాలయం వంటి చోట పని చేస్తూ కూడా ఇలాంటి కళా రూపానికి పునరుజ్జీవం పోయడం విశేషం.కళ పట్ల గౌరవం ఏ పనైనా చేసేటప్పుడు మొహమాటం పడకుండా, మన కళను ప్రదర్శించడానికి రమణ చూపించిన ఉత్సాహం అందరినీ ఆశ్చర్యపరిచింది.వారసత్వ సంరక్షణ: మన పండుగలు, కళలు అంతరించిపోకుండా కాపాడుకోవాలనే సందేశాన్ని రమణ స్వయంగా ఆచరించి చూపిస్తున్నారు,చేసే వృత్తి ఏదైనా మన సంస్కృతిని కాపాడడం మన బాధ్యత" అని చాటిచెబుతున్న రమణ ఇప్పుడు విజయనగరంలో చర్చనీయాంశమయ్యాడు. పండగంటే కేవలం సంబరం మాత్రమే కాదు, ఇలా మన కళలను గౌరవించడం కూడా అని రమణ నిరూపించారు