ఎస్సీ, బీసీ హాస్టళ్లకు బంక్ బెడ్‌లు పంపిణీ

తెలంగాణ రాష్ట్ర ఇంచార్జ్ జనం న్యూస్ ఫిబ్రవరి 20 :

ఝరాసంగం మండల కేంద్రంలో గురువారం హ్యుందాయ్ మోటార్ ఇండియా ఇంజనీరింగ్ ప్రైవేట్ లిమిటెడ్ సంస్థ 2025–26 ఆర్థిక సంవత్సరానికి సంబంధించిన కార్పొరేట్ సామాజిక బాధ్యత (సి.ఎస్.ఆర్) కార్యక్రమంలో భాగంగా తెలంగాణ రాష్ట్రంలోని ప్రభుత్వ ఎస్సీ, బీసీ హాస్టళ్లకు మరియు ప్రభుత్వ పాఠశాలలకు అవసరమైన సామగ్రిని అందించింది. విద్యా మౌలిక సదుపాయాలను బలోపేతం చేయడం, విద్యార్థులకు మరింత సౌకర్యవంతమైన అభ్యాస వాతావరణం కల్పించడం లక్ష్యంగా ఈ కార్యక్రమాన్ని చేపట్టినట్లు సంస్థ ప్రతినిధులు తెలిపారు. ఈ చొరవ కింద హాస్టళ్లలో నివసిస్తున్న విద్యార్థుల కోసం మొత్తం 295 బంక్ బెడ్‌లు, 590 పరుపులు అందజేశారు. అదనంగా 4 మొబైల్ టాయిలెట్లు, 130 ట్రంక్ బాక్స్‌లు (తాళాలతో), 42 ఇనుప నిల్వ రాక్లు పంపిణీ చేశారు. డిజిటల్ విద్యాభివృద్ధి దృష్ట్యా 2 కంప్యూటర్/డెస్క్‌టాప్‌లు, 3 స్కానర్‌తో కూడిన ప్రింటర్లు సమకూర్చారు. గ్రంథాలయ అభివృద్ధికి 2 లైబ్రరీ రాక్లు, తరగతి గదుల కోసం 3 టేబులు, 8 ప్లాస్టిక్ కుర్చీలు ఇచ్చారు. వసతి గృహ అవసరాల కోసం 50 దోమతెరలు, 15 ఫ్యాన్లు, 2 బీరువాలు/అల్మారీలు, 6 విశాలమైన మ్యాట్లు అందజేశారు. ఈ సామగ్రి ద్వారా విద్యార్థులకు మెరుగైన వసతి, పరిశుభ్రత మరియు విద్యా వాతావరణం కలుగుతుందని నిర్వాహకులు తెలిపారు. హాస్టళ్లలో నివసిస్తున్న విద్యార్థులకు సౌకర్యవంతమైన వసతి ఏర్పాటులో ఈ సహాయం ఎంతో ఉపయోగపడుతుందని స్థానిక అధికారులు పేర్కొన్నారు. ఈ సందర్భంగా సంస్థ ప్రతినిధులు మాట్లాడుతూ… సమాజాభివృద్ధికి విద్య కీలకమని, భవిష్యత్తులోనూ విద్యారంగానికి తమ వంతు సహకారం కొనసాగిస్తామని తెలిపారు. ఈ కార్యక్రమంలో మాజీ సర్పంచ్ జగదీశ్వర్, మిత్ర ఓలిస్టిక్ స్వచ్ఛంద సేవ సంస్థ ప్రతినిధులు, విద్యాశాఖ అధికారులు, తదితరులు పాల్గొన్నారు.