జనం న్యూస్ ఫిబ్రవరి 28 2026 ( ఎల్కతుర్తి మండల్ బండి కుమారస్వామి రీపోటర్ )

కుటుంబ దత్తత కార్యక్రమంలో భాగంగా కమ్యూనిటీ మెడిసిన్ విభాగం ఆధ్వర్యంలో విజయవంతమైన వైద్య శిబిరం.వరంగల్‌లోని కాకతీయ మెడికల్ కాలేజ్, వరంగల్ కమ్యూనిటీ మెడిసిన్ విభాగం ఆధ్వర్యంలో కుటుంబ దత్తత కార్యక్రమం (Family Adoption Program)ను విజయవంతంగా నిర్వహించారు. కళాశాల ప్రిన్సిపాల్ డా. సంధ్య సుంకరణేని మార్గదర్శకత్వంలో, కమ్యూనిటీ మెడిసిన్ విభాగాధిపతి డా. శ్రీధర్ మరియు ప్రొఫెసర్ డా. మురళి నేతృత్వంలో ఈ కార్యక్రమం కొనసాగింది.MBBS 2025 బ్యాచ్ విద్యార్థులు కుటుంబ దత్తత కార్యక్రమంలో భాగంగా బావుపేట, తిమ్మాపూర్, గుంటూరుపల్లి, ఆరేపల్లి గ్రామాలను దత్తత తీసుకుని, 28-02-2026 న గుంటూరుపల్లి గ్రామంలో ఉచిత వైద్య శిబిరాన్ని నిర్వహించారు. ఈ కార్యక్రమం గుంటూరుపల్లి, ఆరేపల్లి, తిమ్మాపూర్ గ్రామ సర్పంచుల సహకారంతో సమర్థవంతంగా నిర్వహించబడింది.
ఈ వైద్య శిబిరానికి గుంటూరుపల్లి, ఆరేపల్లి, తిమ్మాపూర్ గ్రామాల నుండి పెద్ద సంఖ్యలో ప్రజలు హాజరై వైద్య సేవలను వినియోగించుకున్నారు. జనరల్ మెడిసిన్, ప్రసూతి & గైనకాలజీ, పిల్లల వైద్యం, ఈఎన్‌టి, కంటి వైద్యం విభాగాల నిపుణ వైద్యులు ఓపీడీ సేవలను అందించారు. రోగులకు ఉచితంగా మందులు పంపిణీ చేయడంతో పాటు రక్తపోటు (BP), షుగర్ పరీక్షలు కూడా ఉచితంగా నిర్వహించారు.
అలాగే వ్యవసాయ కార్మికులకు ఎదురయ్యే సాధారణ ఆరోగ్య సమస్యలు, పని సమయంలో తీసుకోవాల్సిన జాగ్రత్తలు, పోషకాహారం, వ్యక్తిగత పరిశుభ్రతపై ఆరోగ్య అవగాహన కార్యక్రమాన్ని నిర్వహించారు. దీని ద్వారా గ్రామీణ ప్రజల్లో ఆరోగ్య చైతన్యం మరింత పెరిగింది.ఈ కార్యక్రమంలో అసిస్టెంట్ ప్రొఫెసర్లు డా. నరేష్, డా. అనుష, సీనియర్ రెసిడెంట్ డా. మీనూ, పీజీ విద్యార్థులు, హౌస్ సర్జన్లు, ఎంఎస్‌డబ్ల్యూ సరస్వతి, ఆశా కార్యకర్తలు, గ్రామాధికారులు మరియు గ్రామ సర్పంచులు చురుకుగా పాల్గొని కార్యక్రమాన్ని విజయవంతం చేశారు.అధ్యాపకుల సమర్థ నాయకత్వం, వైద్య సిబ్బంది అంకితభావం, విద్యార్థుల సేవాస్ఫూర్తితో ఈ వైద్య శిబిరం పూర్తిస్థాయిలో విజయవంతమై, గ్రామీణ ప్రజలకు నాణ్యమైన ఆరోగ్య సేవలు అందించిన ఆదర్శ కార్యక్రమంగా నిలిచింది.