జనం న్యూస్ ఏప్రిల్ 23 తెలంగాణ స్టేట్ ఇంచార్జ్ శ్రీనివాస్ రెడ్డి

తెలంగాణ ఆత్మను మళ్లీ మ్రోగించిన “దరువు జాతర” రవీంద్రభారతిలో అంగరంగ వైభవంగా జరిగింది. పాత జ్ఞాపకాలను మేల్కొలిపిన ఈ వేడుక, కేవలం రజతోత్సవ కార్యక్రమంగా కాకుండా తెలంగాణ ఉద్యమ స్పూర్తిని మరోసారి ప్రజల ముందుంచిన సాంస్కృతిక మహోత్సవంగా నిలిచింది.సిద్దిపేట డిగ్రీ కళాశాలలో 1999లో పిడికెడు మందితో ప్రారంభమైన దరువు కళాబృందం, 25 ఏళ్ల ప్రయాణంలో తెలంగాణ ఉద్యమానికి కీలక వేదికగా నిలిచిందని పలువురు వక్తలు గుర్తు చేశారు. ఆ ప్రయాణానికి గుర్తుగా నిర్వహించిన ఈ రజతోత్సవ వేడుకలు, వేలాది మంది కళాకారులు, ఉద్యమకారులు, ప్రజాప్రతినిధులతో కళకళలాడాయి.
కార్యక్రమానికి ముఖ్య అతిథిగా హాజరైన మంత్రి జూపల్లి కృష్ణారావు, దరువు కళాబృందాన్ని తెలంగాణ సాంస్కృతిక చైతన్యానికి ప్రతీకగా అభివర్ణించారు. ఉద్యమ కాలంలో తమ ఆటపాటలతో ప్రజల్లో చైతన్యం నింపి, తెలంగాణ అవసరాన్ని కళ్లకు కట్టినట్లు చూపించిన సంస్థగా కొనియాడారు. విద్యార్థుల త్యాగాలను గుర్తు చేస్తూ, ఉస్మానియా యూనివర్సిటీలో విద్యార్థి అమరవీరుల స్మారక స్తూపం నిర్మాణం చేపడతామని హామీ ఇచ్చారు. అలాగే ప్రజా కళల పరిరక్షణ కోసం రీసెర్చ్ సెంటర్ ఏర్పాటు చేస్తామని ప్రకటించారు.
విశిష్ట అతిథులు కూడా తమ అనుభవాలను పంచుకున్నారు. తెలంగాణ ప్రెస్ అకాడమీ చైర్మన్ శ్రీనివాస్ రెడ్డి, అమరవీరుల జ్ఞాపకార్థం ఒక ప్రత్యేక దినాన్ని అధికారికంగా ప్రకటించాలని ప్రభుత్వాన్ని కోరారు. జర్నలిస్టుల సంఘం నాయకుడు విరాహత్ అలీ, దరువు కళాబృందంతో తనకు ఉన్న దీర్ఘ అనుబంధాన్ని గుర్తు చేస్తూ, ఉద్యమంలో వారి పాత్రను ప్రశంసించారు.అరుణోదయ సాంస్కృతిక సమాఖ్య జాతీయ అధ్యక్షురాలు విమలక్క, దరువు ఎల్లన్న, అంజన్నల త్యాగాలను స్మరించుకుని, వారి కృషి కళాకారుల జీవితాల్లో వెలుగులు నింపిందన్నారు. ఎమ్మెల్యే వేముల వీరేశం, దరువు పాటలే తనలో సామాజిక స్పృహను పెంచాయని భావోద్వేగంగా పేర్కొన్నారు.బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్ గౌడ్, అణగారిన వర్గాలు కేవలం కళలకు పరిమితం కాకుండా అధికార దిశగా సాగాలని పిలుపునిచ్చారు. తెలంగాణ ఎస్సీ కార్పొరేషన్ చైర్మన్ ప్రీతం, ఉస్మానియా ఉద్యమంలో దరువు కళాకారుల త్యాగాలను గుర్తు చేసుకున్నారు. సాంస్కృతిక సారధి చైర్మన్ వెన్నెల గద్దర్, దరువు బ్రదర్స్‌పై రాసిన పాటను వినిపించి సభికులను ఆలోచింపజేశారు.ఈ సందర్భంగా “ఓ యుద్ధం”, “వీరులారా వందనం”, “పాట ముచ్చట” అనే మూడు పుస్తకాలను ఆవిష్కరించారు. కేంద్ర సాహిత్య అకాడమీ యువ పురస్కార్ గ్రహీత పసునూరి రవీందర్, దరువు నాయకుల నిస్వార్థ సేవను ప్రశంసించారు.కార్యక్రమం మొత్తం తెలంగాణ సాంస్కృతిక వైభవాన్ని ప్రతిబింబించింది. వివిధ ప్రాంతాల నుంచి వచ్చిన కళాకారులు తమ ఆటపాటలతో ఉద్యమ రోజులను గుర్తు చేస్తూ సభికులను అలరించారు. ప్రత్యేకంగా విడుదలైన పాటలు ప్రేక్షకులను ఆకట్టుకున్నాయి.
మొత్తంగా “దరువు జాతర” తెలంగాణ చరిత్రను, సంస్కృతిని, ఉద్యమ స్పూర్తిని ఒకే వేదికపై సమీకరించిన అరుదైన వేడుకగా నిలిచింది.