నాసిరకం మెటీరియల్‌తో ఇష్టారాజ్యంగా పనులు.. గ్రామపంచాయతీ నిధులతోనే పనులు చేపడుతున్నారంటూ గ్రామస్తుల ఆగ్రహం

జనం న్యూస్ 16/09/2026 జహీరాబాద్ నియోజకవర్గం పరిధిలోని ఝరాసంగం మండలం చిలమామిడి గ్రామంలో చేపడుతున్న నాలా నిర్మాణ పనుల్లో నాణ్యత ప్రమాణాలు పాటించడం లేదని గ్రామస్తులు తీవ్ర ఆగ్రహం వ్యక్తం చేస్తున్నారు. గ్రామపంచాయతీ నిధులతో చేపడుతున్న ఈ పనులను ఎలాంటి కాంట్రాక్టర్‌కు అప్పగించకుండా గ్రామ సర్పంచ్, గ్రామ పంచాయతీ కార్యదర్శి ఆధ్వర్యంలో పనులు చేపడుతున్నప్పటికీ, నిర్మాణంలో నాణ్యతపై నిర్లక్ష్యం కనిపిస్తోందని గ్రామస్తులు ఆరోపిస్తున్నారు.నాలా నిర్మాణానికి వినియోగిస్తున్న మెటీరియల్ నాణ్యతపై అనుమానాలు వ్యక్తమవుతున్నాయని, నిబంధనలకు అనుగుణంగా పనులు నిర్వహించాల్సి ఉన్నప్పటికీ ఇష్టానుసారంగా నిర్మాణ పనులు కొనసాగుతున్నాయని వారు వాపోతున్నారు. ప్రజలకు ఉపయోగపడాల్సిన మౌలిక వసతుల నిర్మాణంలో నాణ్యతకు ప్రాధాన్యత ఇవ్వాల్సి ఉండగా, పనులు జరుగుతున్న తీరుపై గ్రామస్తులు తీవ్ర అసంతృప్తి వ్యక్తం చేస్తున్నారు.
గ్రామపంచాయతీ నిధులతో చేపడుతున్న పనులను సక్రమంగా పర్యవేక్షించాల్సిన బాధ్యత సంబంధిత అధికారులపై ఉన్నప్పటికీ, క్షేత్రస్థాయిలో పర్యవేక్షణ కొరవడిందని గ్రామస్తులు ఆరోపిస్తున్నారు. నిర్మాణంలో ఉపయోగిస్తున్న సామగ్రి, పనుల నాణ్యత, కొలతలు తదితర అంశాలను సంబంధిత అధికారులు పరిశీలించాల్సి ఉన్నా, ఇప్పటివరకు సరైన తనిఖీలు నిర్వహించలేదని వారు అంటున్నారు.ప్రభుత్వ నిధులతో పాటు గ్రామపంచాయతీ నిధులు ప్రజల సొమ్మేనని, ఆ నిధులతో చేపట్టే ప్రతి నిర్మాణ పని నాణ్యతా ప్రమాణాలకు అనుగుణంగా ఉండాలని గ్రామస్తులు డిమాండ్ చేస్తున్నారు. నాసిరకం మెటీరియల్‌తో పనులు చేపట్టి నిర్మాణం పూర్తయిన తర్వాత నాలా దెబ్బతింటే తిరిగి మరమ్మతులకు ప్రజాధనమే ఖర్చు కావాల్సి వస్తుందని ఆందోళన వ్యక్తం చేస్తున్నారు.చిలమామిడిలో జరుగుతున్న నాలా నిర్మాణ పనులను సంబంధిత అధికారులు వెంటనే క్షేత్రస్థాయిలో పరిశీలించి, ఉపయోగిస్తున్న మెటీరియల్ నాణ్యతను సాంకేతిక నిపుణులతో పరీక్షించాలని గ్రామస్తులు కోరుతున్నారు. పనుల్లో నాణ్యతా లోపాలు ఉన్నట్లు తేలితే బాధ్యులపై చర్యలు తీసుకోవాలని, గ్రామపంచాయతీ నిధులు సక్రమంగా వినియోగించేలా పారదర్శకంగా పనులు నిర్వహించాలని వారు డిమాండ్ చేస్తున్నారు.“గ్రామ ప్రజలకు ఉపయోగపడాల్సిన పనుల్లో నాణ్యతకు తిలోదకాలు ఇవ్వడం సరికాదు. గ్రామపంచాయతీ నిధులతో చేపడుతున్న పనులను అధికారులు పర్యవేక్షించి, నాణ్యత ప్రమాణాలు పాటించేలా చర్యలు తీసుకోవాలి. లేకపోతే ప్రజాధనం వృథా అయ్యే ప్రమాదం ఉంది” అని గ్రామస్తులు ఆగ్రహం వ్యక్తం చేస్తున్నారు.