మెట్‌పల్లి, అక్టోబర్ 1 (జనం న్యూస్ స్టాఫ్ రిపోర్టర్ బెజ్జారపు శ్రీనివాస్ ): జగిత్యాల జిల్లా, మెట్‌పల్లి పట్టణంలో నూతన కోర్టు భవన నిర్మాణానికి ప్రతిపాదించిన స్థలాన్ని కోరుట్ల ఎమ్మెల్యే డాక్టర్ కల్వకుంట్ల సంజయ్ గురువారం పరిశీలించారు. ప్రస్తుతం ఉన్న కోర్టు ప్రాంగణానికి ఆనుకుని ఉన్న సుమారు 38 గుంటల నీటిపారుదల శాఖ భూమిని కోర్టు భవన నిర్మాణానికి కేటాయించేందుకు ప్రతిపాదనలు ఉన్న నేపథ్యంలో ఎమ్మెల్యే స్థలాన్ని సందర్శించారు. ఈ సందర్భంగా ఇరిగేషన్ శాఖ అధికారులతో స్థలానికి సంబంధించిన వివరాలు, భూమి విస్తీర్ణం, కోర్టు భవన నిర్మాణానికి అవసరమైన స్థలం తదితర అంశాలపై ఎమ్మెల్యే చర్చించారు. నూతన కోర్టు భవనం నిర్మాణం భవిష్యత్ అవసరాలను దృష్టిలో ఉంచుకుని ఉండాలని, భవిష్యత్‌లో విస్తరణకు కూడా తగినంత అవకాశం ఉండేలా ప్రస్తుత కోర్టు ప్రాంగణానికి ఆనుకుని ఉన్న స్థలాన్నే కేటాయించడం అనుకూలంగా ఉంటుందని ఎమ్మెల్యే సూచించారు. కోర్టు భవన నిర్మాణానికి ప్రతిపాదించిన స్థలాన్ని త్వరగా అందుబాటులోకి తీసుకురావడంతో పాటు, ప్రస్తుతం మంజూరైన నీటిపారుదల శాఖ డివిజన్ కార్యాలయాన్ని ప్రత్యామ్నాయంగా అనువైన స్థలంలో నిర్మించేలా చర్యలు తీసుకోవాలని సంబంధిత అధికారులను ఎమ్మెల్యే కోరారు. మెట్‌పల్లిలో నూతన కోర్టు భవనం నిర్మాణం పూర్తయితే న్యాయవాదులు, న్యాయ సిబ్బంది, కక్షిదారులకు మరింత మెరుగైన వసతులు అందుబాటులోకి వస్తాయని ఆయన పేర్కొన్నారు. కోర్టు భవన నిర్మాణ ప్రక్రియ త్వరితగతిన ముందుకు సాగేలా అవసరమైన చర్యలు తీసుకుంటామని ఎమ్మెల్యే తెలిపారు. ఈ కార్యక్రమంలో ఇరిగేషన్ ఈఈ సురేష్, బార్ అసోసియేషన్ అధ్యక్షుడు రాంరెడ్డి, ఇరిగేషన్ శాఖ అధికారులు, బార్ అసోసియేషన్ సభ్యులు తదితరులు పాల్గొన్నారు.