జనం న్యూస్ | : పశ్చిమ బెంగాల్లోని సిలిగురి ప్రాంతానికి చెందినదిగా ప్రచారం జరుగుతున్న ఓ వీడియో సోషల్ మీడియాలో వైరల్గా మారింది. ఇందులో ఓ మహిళా పోలీసు అధికారి మరో మహిళను తనవైపు లాగి ముద్దు పెట్టుకున్నట్లు కనిపించడంతో తీవ్ర విమర్శలు వెల్లువెత్తాయి. మహిళల భద్రత కోసం సిలిగురి పోలీస్ కమిషనరేట్ 24 గంటలూ పనిచేసే ‘పింక్ పెట్రోల్ వ్యాన్లను’ ఇటీవల ప్రారంభించింది. మహిళల భద్రతను మెరుగుపరిచే ఉద్దేశంతో పోలీస్ కమిషనర్ సి. సుధాకర్ రెండు పింక్ పెట్రోల్ వాహనాలను ప్రారంభించినట్లు స్థానిక కథనాలు పేర్కొన్నాయి. అయితే, వాటిలో ఒకదానికి బాధ్యత వహిస్తున్న మహిళా పోలీసు అధికారి విధుల్లో ఉండగానే ఓ మహిళతో అనుచితంగా ప్రవర్తించినట్లు ఆరోపణలు రావడం వివాదానికి దారితీసింది. వైరల్ వీడియోలో సదరు అధికారి ఓ మహిళను పట్టుకుని ఆమె పెదవులపై ముద్దు పెట్టుకున్నట్లు కనిపిస్తోంది. విధుల్లో ఉన్న సమయంలో ఆమె మద్యం మత్తులో ఉన్నట్లు కూడా స్థానిక నివేదికలు ఆరోపించాయి. సోషల్ మీడియా పోస్టుల ప్రకారం సదరు అధికారిని ఏఎస్ఐ తాన్యా రాయ్గా గుర్తించినట్లు ప్రచారం జరుగుతోంది. వీడియో వైరల్ అయిన అనంతరం ఆమెను సస్పెండ్ చేసినట్లు సమాచారం. ఇదే అధికారిపై సిలిగురిలో రాత్రి సమయంలో పాఠశాల ప్రాంతంలో మాట్లాడుకుంటున్న ఇద్దరు మైనర్లపై కూడా దురుసుగా ప్రవర్తించినట్లు ఆరోపణలు వచ్చాయి. ఆ ఇద్దరిలో ఒకరు బాలిక, మరొకరు బాలుడు కాగా, వారు కేవలం మాట్లాడుకుంటున్నారని, ఎలాంటి అసభ్యకర ప్రవర్తనకు పాల్పడలేదని వారి తల్లిదండ్రులు, స్థానికులు తెలిపారు. అయితే సదరు అధికారి మద్యం మత్తులో వారిని ప్రశ్నించకుండానే దుర్భాషలాడినట్లు ఆరోపణలు ఉన్నాయి. అనంతరం ఓ మహిళా పౌరురాలితోనూ అనుచితంగా ప్రవర్తించినట్లు ఆరోపణలు వెలువడ్డాయి. ఈ వ్యవహారంపై సీనియర్ పోలీసు అధికారులను స్థానికులు సంప్రదించగా, సంబంధిత అధికారిని ఇప్పటికే సస్పెండ్ చేసి, శాఖాపరమైన విచారణ ప్రారంభించినట్లు వారు వెల్లడించినట్లు సమాచారం. మహిళలు, మైనర్ల భద్రతను దృష్టిలో ఉంచుకుని ఆరోపణలు ఎదుర్కొంటున్న అధికారిపై కఠిన చర్యలు తీసుకోవాలని స్థానికులు డిమాండ్ చేస్తున్నారు.
