పట్టుదలతో చదివి మెడికల్ సీటు సాధించిన హన్సిక

స్టేట్ మెరిట్ ర్యాంక్ 6547తో ఆసిఫాబాద్ ప్రభుత్వ వైద్య కళాశాలలో ఎంబీబీఎస్ సీటు

రాయికల్, సెప్టెంబర్ 09: జగిత్యాల జిల్లా రాయికల్ మండలం రేగుంట గ్రామానికి చెందిన మోతె శ్రీనివాస్–సంజన దంపతుల కుమార్తె హన్సిక పట్టుదల, కృషితో చదివి ఎంబీబీఎస్ మెడికల్ సీటు సాధించి తన ప్రతిభను చాటుకుంది. ఎంబీబీఎస్ మొదటి రౌండ్ కౌన్సెలింగ్ ఫలితాల్లో స్టేట్ మెరిట్ ర్యాంక్ 6547 సాధించి, ఆసిఫాబాద్ ప్రభుత్వ వైద్య కళాశాలలో ఎంబీబీఎస్ సీటు పొందింది.హన్సిక తన విద్యాభ్యాసాన్ని నిజామాబాద్‌లోని ఎస్ఆర్ కళాశాలలో కొనసాగిస్తూ, వైద్య విద్యలో సీటు సాధించాలనే లక్ష్యంతో క్రమశిక్షణతో చదువుపై దృష్టి సారించింది. తల్లిదండ్రుల ప్రోత్సాహం, ఉపాధ్యాయుల మార్గదర్శకత్వంతో నిరంతరం శ్రమించి మెడికల్ సీటు సాధించడం పట్ల కుటుంబ సభ్యులు, బంధువులు, స్నేహితులు, గ్రామస్థులు ఆనందం వ్యక్తం చేశారు.గ్రామీణ ప్రాంతానికి చెందిన విద్యార్థిని రాష్ట్ర స్థాయిలో మంచి మెరిట్ ర్యాంక్ సాధించి ప్రభుత్వ వైద్య కళాశాలలో సీటు పొందడం పట్ల రేగుంట గ్రామ ప్రజలు ప్రత్యేకంగా హర్షం వ్యక్తం చేశారు. హన్సిక విజయం గ్రామంలోని ఇతర విద్యార్థులకు కూడా స్ఫూర్తిదాయకమని పలువురు పేర్కొన్నారు.ఈ సందర్భంగా పలువురు ప్రజాప్రతినిధులు, గ్రామ పెద్దలు, విద్యావేత్తలు హన్సికను అభినందించారు. భవిష్యత్తులో వైద్య విద్యను విజయవంతంగా పూర్తి చేసి, ఉత్తమ వైద్యురాలిగా ఎదిగి పేదలు, సామాన్య ప్రజలకు నాణ్యమైన వైద్య సేవలు అందించాలని ఆకాంక్షించారు.తల్లిదండ్రులు మాట్లాడుతూ తమ కుమార్తె చిన్ననాటి నుంచి చదువుపై ఎంతో శ్రద్ధ చూపుతూ, వైద్యురాలిగా ఎదగాలనే లక్ష్యంతో కష్టపడి చదివిందని తెలిపారు. ఆమె సాధించిన విజయం తమ కుటుంబానికే కాకుండా రేగుంట గ్రామానికి కూడా గర్వకారణమని పేర్కొన్నారు.