జనం న్యూస్, ఫిబ్రవరి 12 – తెలంగాణ స్టేట్ ఇన్చార్జి శ్రీనివాస్ రెడ్డి
సేవే లక్ష్యంగా, శాంతిభద్రతలే ధ్యేయంగా రెండు దశాబ్దాలకుపైగా ప్రజలకు అండగా నిలుస్తున్న సైబరాబాద్ పోలీస్ కమిషనరేట్ 24వ స్థాపిత దినోత్సవ వేడుకలు కూకట్పల్లిలో ఘనంగా నిర్వహించారు. ఈ సందర్భంగా పోలీస్ శాఖ సేవలను గుర్తుచేసుకుంటూ, ప్రజలతో అనుబంధాన్ని మరింత బలపరిచేలా కార్యక్రమం సాగింది. కూకట్పల్లి పోలీస్ ఇన్స్పెక్టర్ కె.వి. సుబ్బారావు ఆధ్వర్యంలో నిర్వహించిన ఈ వేడుకలకు ఏసీపీ నరేష్ రెడ్డి ముఖ్య అతిథిగా హాజరై జెండా ఆవిష్కరించారు. అనంతరం కేక్ కట్ చేసి అక్కడికి విచ్చేసిన చిన్నారులకు, పెద్దలకు స్వీట్లు పంపిణీ చేశారు. కార్యక్రమం ఉత్సాహభరిత వాతావరణంలో కొనసాగింది.
ఈ సందర్భంగా ఏసీపీ నరేష్ రెడ్డి మాట్లాడుతూ, “సైబరాబాద్ కమిషనరేట్ స్థాపనకు 24 సంవత్సరాలు పూర్తవుతున్న ఈ సందర్భంలో శాంతిభద్రతల పరిరక్షణలోనూ, ట్రాఫిక్ నియంత్రణలోనూ పోలీసులు నిరంతరం కృషి చేస్తున్నారు. ప్రజల అవసరాలే మా ప్రాధాన్యత. ఎలాంటి సమస్య వచ్చినా పోలీస్ శాఖ ఎల్లప్పుడూ ప్రజలకు అందుబాటులో ఉంటుంది,” అని స్పష్టం చేశారు. సమాజంలోని ప్రతి వర్గానికి భరోసా కల్పించడం పోలీస్ శాఖ ధర్మమని ఆయన పేర్కొన్నారు.సీఐ కె.వి. సుబ్బారావు మాట్లాడుతూ, కార్యక్రమానికి విచ్చేసిన ఏసీపీ నరేష్ రెడ్డికి, పోలీస్ సిబ్బందికి, ప్రాంతీయ పెద్దలకు కృతజ్ఞతలు తెలిపారు. పోలీస్ శాఖపై ప్రజల నమ్మకాన్ని నిలబెట్టుకోవడం తమ బాధ్యతగా భావిస్తున్నామని ఆయన చెప్పారు.
ఈ వేడుకల్లో ఎస్సై రామకృష్ణ, ఎస్సై చంద్రశేఖర్ తదితర పోలీస్ సిబ్బంది పాల్గొన్నారు. అలాగే రామకృష్ణ వెల్ఫేర్ అసోసియేషన్ అధ్యక్షులు జనంపల్లి పురేందర్ రెడ్డి ఏసీపీ నరేష్ రెడ్డి, సీఐ కె.వి. సుబ్బారావులను శాలువాలతో సన్మానించి అభినందనలు తెలిపారు. కేక్ తినిపిస్తూ పోలీస్ శాఖకు శుభాకాంక్షలు తెలియజేశారు.కూకట్పల్లి పోలీస్ అధికారులు ఎల్లప్పుడూ ప్రజలకు ఇబ్బందులు కలగకుండా ముందస్తు చర్యలు తీసుకుంటూ, సమస్యలను వేగంగా పరిష్కరిస్తూ ప్రజలకు అందుబాటులో ఉంటారని కార్యక్రమంలో పాల్గొన్నవారు అభిప్రాయపడ్డారు. కార్యక్రమంలో పాల్గొన్న అధికారులకు, సిబ్బందికి జనంపల్లి పురేందర్ రెడ్డి ప్రత్యేక అభినందనలు తెలియజేశారు.సైబరాబాద్ పోలీస్ కమిషనరేట్ 24 ఏళ్ల ప్రయాణం ప్రజల భద్రతకు అంకితం కావడం విశేషం. ప్రజలతో కలిసి ముందుకు సాగుతూ మరిన్ని విజయాలు సాధించాలని స్థానికులు ఆకాంక్షించారు.