ఖమ్మం జిల్లా ఏన్కూర్ మండలం జనం న్యూస్ రిపోర్టర్ ఠాగూర్ మార్చి 25 : ఏన్కూర్ మండల కేంద్రంలో డ్రైనేజీ వ్యవస్థ దయనీయ స్థితి స్థానికులను ఆందోళనకు గురిచేస్తోంది. ప్లాస్టిక్, చెత్తా చెదారంతో నిండిపోయిన డ్రైనేజీ కాలువలు, మురుగునీరు రోడ్లపైకి వచ్చే పరిస్థితి, దుర్వాసనతో కూడిన వాతావరణం ఇవన్నీ ఇక్కడి ప్రజల జీవనాన్ని దుర్భరం చేస్తున్నాయి. పక్కనే ప్రాథమిక పాఠశాల మరియు అంగన్వాడీ పిల్లల పాఠశాలలు ఉన్నాయి, అధికారుల నిర్లక్ష్యం, పట్టించుకోని వైఖరి వల్ల ఈ సమస్య మరింత తీవ్రమైందని స్థానికులు ఆరోపిస్తున్నారు. ఒకప్పుడు స్వచ్ఛంగా, సాఫీగా ప్రవహించే డ్రైనేజీ కాలువలు ఇప్పుడు చెత్త కుప్పలతో నిండిపోయాయి. ప్లాస్టిక్ సంచులు, ఖాళీ బాటిళ్లు, గుడ్డలు, ఇతర వ్యర్థాలు కాలువలను మూసుకుపోయేలా చేశాయి. దీని వల్ల మురుగునీరు ప్రవహించక, చుట్టుపక్కల ప్రాంతాల్లో చేరి, దోమలు, ఈగల సమస్యను తీవ్రతరం చేస్తోంది. ఇది డ్రైనేజీ కాలువ కాదు, చెత్త కుండీ అయిపోయింది. అధికారులకు ఎన్నిసార్లు చెప్పినా పట్టించుకోవడం లేదు, అని స్థానికులు ఆవేదన వ్యక్తం చేశారు.
అధికారులు మాత్రం ఈ సమస్యపై నిర్లక్ష్య వైఖరి కొనసాగిస్తున్నారు. డ్రైనేజీ కాలువలను శుభ్రం చేయడం, చెత్తను తొలగించడం, మురుగునీరు సాఫీగా ప్రవహించేలా చర్యలు తీసుకోవడంలో వారు పూర్తిగా విఫలమయ్యారని స్థానికులు ఆగ్రహం వ్యక్తం చేస్తున్నారు. ఎన్నికల సమయంలో పెద్ద పెద్ద హామీలు ఇస్తారు. కానీ ఇలాంటి ప్రాథమిక సమస్యలు పరిష్కరించడానికి ఎవరూ ముందుకు రారు అని గ్రామస్తులు మరియు వచ్చి పోయే ప్రయాణికులు విమర్శించారు.ప్రభుత్వం, స్థానిక అధికారులు వెంటనే ఈ సమస్యపై దృష్టి సారించి, డ్రైనేజీ వ్యవస్థను శుభ్రపరిచేందుకు చర్యలు తీసుకోవాలని ప్రజలు కోరుతున్నారు.