జనం న్యూస్. తర్లుపాడు మండలం. నవంబర్ 28
తర్లుపాడు మండలం చెన్నారెడ్డిపల్లి గ్రామంలో కంది పంటపై మండల వ్యవసాయ అధికారి పి జోష్ణ దేవి పొలంబడి కార్యక్రమం నిర్వహించారు. ప్రస్తుతం కంది పంటలో మొగ్గదశ మరియు పూత దశలోకి ప్రవేశిస్తున్నందున రైతులు తప్పనిసరిగా పురుగు గుడ్డును నివారించుకోవడానికి వేపనూనె పిచికారి చేసుకోవాలని సూచించారు. ప్రకృతి వ్యవసాయ సిబ్బంది ద్వారా తయారు చేయబడిన వేప కషాయాన్ని రైతులకు అందించారు. పొలంబడి కంది పంట క్షేత్రంలో వేప కషాయం పిచికారి చేసి రైతులకు చూపించారు. కంది పంటలో మారుకా మచ్చల పురుగు ఎక్కువగా ఆశించి మొగ్గలో గుడ్లు పెడుతుండడం రైతులకు చూపించారు. ఈ గుడ్లు పిల్ల పురుగులు గా అభివృద్ధి చెంది ఆకులను మొగ్గలను కలిపి గూడుగా ఏర్పాటు చేసుకొని పురుగు జీవితచక్రాన్ని పూర్తి చేసుకుంటాయని తద్వారా కంది పంటకు అధిక నష్టమే కలుగజేస్తాయని తెలియజేశారు. మారుకా మచ్చల పురుగు నివారణకు 20% ఈసీ క్లోరోపైర్ఫాస్ లేదా ఎసిఫేట్ పురుగుమందులను వేప కషాయంతో కలిపి పిచ్చకారి చేసుకోవాలని తెలియజేశారు. పొలంబడి కార్యక్రమంలో ఏఈఓ దేవేంద్ర గౌడ్, గ్రామ వ్యవసాయ సహాయకులు అరవింద్, వెంకటేశ్వర్ రెడ్డి ,చెన్నారెడ్డిపల్లి గ్రామ రైతులు పాల్గొన్నారు.
