జనం న్యూస్ ఫిబ్రవరి 27 తెలంగాణ స్టేట్ ఇంచార్జ్ శ్రీనివాస్ రెడ్డి
మూడు దశాబ్దాలకుపైగా విద్యా సేవలో నిష్టతో పనిచేసిన ప్రభుత్వ ఉపాధ్యాయుడు పెంటపర్తి లక్ష్మి నరసింహారెడ్డి పదవి విరమణ సందర్భంగా ప్రగతి ధర్మారం గ్రామంలోని ఫంక్షన్ హాల్లో ఆదివారం సాదర సన్మాన కార్యక్రమం ఘనంగా నిర్వహించారు. గ్రామ పెద్దలు, సహచర ఉపాధ్యాయులు, విద్యార్థులు, కుటుంబ సభ్యులు పెద్ద సంఖ్యలో హాజరై ఆయన సేవలను కొనియాడారు.ఈ సందర్భంగా రామకృష్ణ వెల్ఫేర్ అసోసియేషన్ అధ్యక్షుడు జనంపల్లి పురేందర్ రెడ్డి మాట్లాడుతూ, “34 సంవత్సరాల సుదీర్ఘ సేవా కాలంలో లక్ష్మి నరసింహారెడ్డి వేలాది మంది విద్యార్థులకు విద్యాబుద్ధులు నేర్పి, వారిని ఉత్తమ పౌరులుగా తీర్చిదిద్దారు. ఉపాధ్యాయ వృత్తికి వన్నె తెచ్చిన మహనీయుడిగా పేరు ప్రతిష్టలు సంపాదించారు” అని అన్నారు. విద్య అంటే కేవలం పాఠ్యపుస్తకాలకే పరిమితం కాదని, జీవన విలువలను బోధించడం ఆయన ప్రత్యేకత అని పేర్కొన్నారు.పదవి విరమణ రోజున కూడా ఆయన కళ్లలో విద్యార్థుల పట్ల అదే మమకారం కనిపించిందని సహచరులు భావోద్వేగంగా తెలిపారు. ఇన్నేళ్లు పిల్లలతో ఆటపాటలతో పాటు విద్యాబోధనలో నిమగ్నమై, సిబ్బందితో కలిసిమెలిసి పాఠశాల అభివృద్ధికి కృషి చేసిన వ్యక్తిగా ఆయన గుర్తుండిపోతారని అన్నారు.
లక్ష్మి నరసింహారెడ్డి దంపతులకు శాలువా కప్పి, పుష్పగుచ్ఛాలు అందజేసి ఘనంగా సన్మానించారు. కుటుంబ సభ్యులు, బంధుమిత్రులు, తోటి ఉపాధ్యాయులు, పూర్వ విద్యార్థులు ఆయనకు శుభాకాంక్షలు తెలిపారు. ఈ సందర్భంగా జనంపల్లి పురేందర్ రెడ్డి మాట్లాడుతూ, “లక్ష్మి నరసింహారెడ్డి దంపతులు నిండు నూరేళ్లు అష్టైశ్వర్యాలతో, ఆరోగ్యంతో కుటుంబ సభ్యులతో కలకలలాడుతూ జీవించాలని కోరుకుంటున్నాం” అని ఆకాంక్షించారు.కార్యక్రమంలో శ్రీనివాస్ రెడ్డి, వజ్ర శేఖర్ రెడ్డి, రమేష్, వెంకటేశ్వర్ రెడ్డి, జి. నర్సింగరావు, సుధాకర్ రెడ్డి, రవికుమార్ తదితరులు పాల్గొని నరసింహారెడ్డికి పదవి విరమణ శుభాకాంక్షలు తెలిపారు.
సుదీర్ఘ విద్యాసేవకు గుర్తింపుగా నిర్వహించిన ఈ సన్మాన కార్యక్రమం గ్రామంలో ఒక స్మరణీయ ఘట్టంగా నిలిచింది.
