జనం న్యూస్ 26 మార్చి 2026 జిల్లా బ్యూరో ఇన్చార్జి జోగులాంబ గద్వాల్ జిల్లా విష్ణు వర్ధన్ గౌడ్
హైదరాబాద్: హైదరాబాద్ సిటీ కమిషనర్ టాస్క్ఫోర్స్ (జూబ్లీహిల్స్ జోన్) బృందం, ఫుడ్ అడల్టరేషన్ (ఆహార కల్తీ నియంత్రణ) విభాగం అధికారులతో కలిసి అత్తాపూర్ పోలీస్ స్టేషన్ పరిధిలోని రాజేంద్రనగర్, ఎం.ఎం. పహాడీలో గల “డెక్కన్ ట్రేడర్స్” గోడౌన్లపై ఆకస్మిక దాడులు నిర్వహించింది. ప్రజల ఆరోగ్యానికి హాని కలిగించేలా అత్యంత అపరిశుభ్ర వాతావరణంలో నకిలీ అల్లం వెల్లుల్లి పేస్ట్ను తయారు చేస్తున్న ముగ్గురు నిందితులను పోలీసులు అదుపులోకి తీసుకున్నారు.నిందితుల వివరాలు: అరెస్టయిన ముగ్గురు నిందితులు సొంత సోదరులు మరియు సదరు వ్యాపార యజమానులు:సోహైల్ చరానియా (38), తండ్రి: బర్కత్ అలీ, నివాసం: సిల్వర్ జూబ్లీ సొసైటీ, సికింద్రాబాద్.రహీమ్ చరానియా (36), తండ్రి: బర్కత్ అలీ, నివాసం: సిల్వర్ జూబ్లీ సొసైటీ, సికింద్రాబాద్.అమిత్ చరానియా (35), తండ్రి: బర్కత్ అలీ, నివాసం: సిల్వర్ జూబ్లీ సొసైటీ, సికింద్రాబాద్.స్వాధీనం చేసుకున్న సొత్తు (విలువ సుమారు రూ. 3,50,000/-):• అల్లం వెల్లుల్లి పేస్ట్: 70 క్వింటాళ్లు• సింథటిక్ ఫుడ్ కలర్ ప్యాకెట్లు: 01 బాక్స్ • శాంటిక్ యాసిడ్ టిన్: 01 (40 లీటర్లు)
• ఆదిత్య బిర్లా కెమికల్స్: 01 బాక్స్ కేసు వివరాలు మరియు నేర విధానం: నిందితులు ముగ్గురు కలిసి ఎం.ఎం. పహాడీలోని రెండు వేర్వేరు ప్రాంతాల్లో గోడౌన్లను నడుపుతున్నారు. వీరు తక్కువ ఖర్చుతో ఎక్కువ లాభాలు గడించడం కోసం శాంటిక్ యాసిడ్, ఎసిటిక్ యాసిడ్, సింథటిక్ ఫుడ్ కలర్ మరియు వెల్లుల్లి పొట్టును కలిపి నకిలీ అల్లం వెల్లుల్లి పేస్ట్ను తయారు చేస్తున్నారు. ఈ తయారీ ప్రక్రియ అత్యంత అపరిశుభ్రంగా, ఈగలు, దుమ్ము ధూళి మధ్య జరుగుతోంది. ఇలా తయారు చేసిన ప్రమాదకరమైన పేస్ట్ను ప్లాస్టిక్ డబ్బాల్లో నింపి, హైదరాబాద్ నగరంలోని హోల్సేల్ కిరాణా దుకాణాలకు మరియు క్యాటరింగ్ సర్వీసులకు సరఫరా చేస్తూ ప్రజల ప్రాణాలతో చెలగాటమాడుతున్నారు.పోలీసు చర్యలు:పక్కా సమాచారంతో జరిపిన ఈ దాడిలో నిందితులను పట్టుకుని, స్వాధీనం చేసుకున్న సొత్తుతో సహా తదుపరి చర్యల నిమిత్తం అత్తాపూర్ పోలీసులకు అప్పగించారు. ఈ దాడి జూబ్లీహిల్స్ జోన్ టాస్క్ఫోర్స్ ఇన్స్పెక్టర్ శ్రీ సిహెచ్. యదేందర్, వారి సిబ్బంది మరియు అత్తాపూర్ పోలీసులు సంయుక్తంగా నిర్వహించారు.జారీ చేసిన వారు:గైక్వాడ్ వైభవ్ రఘునాథ్, ఐపిఎస్ డిప్యూటీ కమిషనర్ ఆఫ్ పోలీస్, కమిషనర్ టాస్క్ఫోర్స్, హైదరాబాద్.